الكارثة الصحية بالاقصر

[ زملائنا الأعزاء بالأقصر مشكلتكم ومحاولة هدم مستشفاكم و تشريد أطبائها و إجبار المرضى على اللجوء لمستشفي يلزمهم بدفع مقابل للخدمة الطبية .... كل هذا مشكلة كبيرة جدا .. وقد أرسلنا فعلا الشكاوى التي وصلت منكم مع تعليقنا للجرائد .. ولكنها لم تنشر .. نستكيع فهم السبب .. هناك العديد من الفجوات في الموضوع من المهم فهمها .. مثلا هل المستشفى العام أيل للسقوط أو له قرار إزالة ؟ هل مازال يعمل و هناك إنتدابات لبعض أطبائه أم إغلق بالفعل ؟ نتمنى أن تكتبوا في شكواكم إيميل يمكننا من التواصل معكم نحن و الصحفيين مرة أخرى نذكركم بضرورة أخذ موقف قوي إذا كنتم تريدوا إثارة الموضوع بقوة في الإعلام.. ولا تنسوا درس مستشفى رمد الجيزة

أطباء بلا حقوق


"شكاوى الأطباء (متجدد)!ا":
اخر تطورات مذبحة مستشفى الاقصر العام ......ارسلنا شكوى لكل من وزير الصحة ومحافظ الاقصر ورئيس النيابة الادرايه ورئيس هيئة الرقابة الادارية ورئيس الجهاز المركزى للمحاسبات ونقيب الاطباء موقعة من تمانية واربعين نايب وقلنا فيها اننا موش رافضين فكرة الانتداب لمستشفى الاقصر الدولى بس بضوابط وبقرار رسمى واننا لما ننتدب نروح بكرامتنا نشتغل فى الاقسام الداخلية موش بالطريقه الحاليه المهينة اللى عاملها وكيل الوزارة لينا باننا نشتغل فى الطوارىء بس تلات مرات فى الشهر وممنوع ندخل الاقسام الداخلية ويبقى كدة النايب مقضى نيابته طوارىء وعنه ما اشتغل عمليات او عيادة خارجيه وعنه ما اتعلم حاجة ..........المهم ان الدنيا اتقلبت ووكيل الوزارة كان فى شرم فى مؤتمر لما بعتنا الفاكسات واول ما وصل بعدها بساعتين عمل اجتماع عاجل للنواب وبمنتهى الوقاحة قال انا اللى فى دماغى هاعمله ومش هاطلع قرار رسمى بكدة وهتروحوا بصفة وديه واذا كان عاجبكم والاتنين النواب اللى كانوا ماضيين بالاعتراض على كدة نقل واحد فيهم مخ واعصاب الى مستشفى مركزى تصوروا مخ واعصاب فى مركزى ياللسخريه والتانى الزمه انه يقعد اريعة وعشرين ساعه فى طوارىء الاقصر الدولى ومن النهاردة وقال انه ما بياخدشى اوامرة من حد ان ما حدش له سلطه عليه .......وتوعد باللفظ انه (هيقرفنا فى عيشتنا ) علشان اتجرأنا واشتكينا و بالفعل جه المستشفى النهاردة الساعة تمانيه الصبح وخد اسماء اكتر من تلاتين نايب لانهم موش فى مكاتب اقسامهم اللى هى متر فى متر ونقسم بالله انه قال لاحد النواب انه هيقفل المستشفى دى لان الناس اللى فيها بتتنطط وموش على بعضها وبعد ما كتب الاسماء وادى الكل تلات ايام جزا للادب قال ان دة سلاح من اسلحته وان ماحدش هيمنعه يعمل اللى عاوزة على فكرة وكيل الوزارة ده من البحيرة وكان ماسك مدير مستشفى كفر الدوار ومشى منها بفضيحة بعد ما اتخانق مع اطباء المستشفى وضربوه وقطعوله هدومه من كام سنه وخلوا الوزير ييجى بنفسه ويقوله قدامهم انت تخلى دلوقتى وتسبقنى ع الوزارة ومن يومها قاعد فى الوزارة سبع سنين من غير عمل لغاية ما زهقوا منه وبعتوه على الاقصر اللى بيقول عليها جبل فلوس ولا يمكن يسيبها الراجل دة اسمه (محمد ابراهيم نعمة الله) واحفظوا الاسم كويس بالذات الاخوة من البحيرة للذكرى لان الناس هنا ما اتعودتش ع الشكاوى الناس هنا بتاخد حقها بدراعها اللهم قد بلغنا اللهم فاشهد ....نداء اخير للاخوة فى ادارة المدونه بلاش تطنشونا لان احنا بنشوف اهتمامكم بشمال سينا والقنطرة مع ان لو جه مندوب منكم وشاف الوضع هنا والله هايسيب البلد والرسول ص قال (من فرج عن مؤمن كربة منكرب الدنيا فرج الله عنه كربه من كرب يوم القيامه ) وحسبى الله ونعم الوكيل فى ى (((نقابة اطباء غزة))) اللى احنا موش فى بالها واحنا متاكدين ان حقنا هناخده بس برضو حد يوصل صوتنا .نرجو من ادارة المدونه الاهتمام وشكرا والسلام عليكم

Posted by Anonymous to أطباء بلا حقوق at February 10, 2009 8:06 PM