بنوك الدم لا تبلغ المتبرعين بالدم الذين يتبين اصلبتهم بفيروسات الكبد بي و سي وتتركهم بلا علاج

أنا طبيبة من المحلة الكبرى

وأقسم بالله العظيم ان هذا الموضوع حقيقي ومستعدة لقول هذا أمام الدنيا كلها

كنت أثناء زياراتي لصديقة لي كانت تعمل ببنك الدم بمستشفى المحلة العام أجد السائقين الراغبين بتجديد الرخصة يؤخذ منهم كيس دم اجباري

المهم.. قريب مش من زمان جاتني فكرة:هم اللي بيلاقوا عندهم بي ولا سي ولا ايدز بيقولولهم ولا لأ؟؟؟؟؟

وتوقعت أنه لأ.. طبعا من سياسة دولة حريصة على ابادة الشعب ومن سلبية واهمال وقتل شبه عمد من أطباء وممرضين وموظفين-عامة-فاكرين ان ربنا مش هيحاسبهم طالما بينفذوا التعليمات وخلاص

سألت من أسبوع تقريبا عن الموضوع ده في بنك الدم في المحلة فالفنية قالتلي ان هم بقالهم سنة تقريبا ما بياخدوش تبرعات واللي بيتبرعوا بيروحوا طنطا

اتصلت بالمركز الأقليمي لبنوك الدم في طنطا وبرضه فنية اللي ردت علي , أنا عملت عليها حدوتة كده .. المهم فهمت منها ان اللي بيطلع ما عندوش حاجة بيتصلوا بيه يبلغوه" يباركوله يعني"واللي بيطلع عنده ايدز بيكلموه برضه وبيحولوه علي مكان تاني في القاهرة

أما بقى اللي عنده قيروس بي أو سي فالفنية قالتلي انهم مابيقولولوش علشان يا عيني فيهم شباب بيخافوا عليهم من الصدمة!!!!! وطبعا الفنية مالهاش ذنب لأنها ماتعرفش

بس أنا فهمتها أن بي وسي دول عاملين زي الأيدز ممكن الواحد ينقله لمراته , وعند الحلاق , وعند دكتور الأسنان وغيره كتييييير

وقلتلها ان أنا عندي بنت قريبتي عندها5 سنين- ودي حقيقة- جالها فيروس سي وعمرما ما عملت عملية ولا خدت دم ولا راحت لدكتور أسنان

كل علاقتها بالفيروس أن عمها اللي ساكن معاهم في بيت العائلة-هم ريفيين- عنده فيروس سي ممكن جدا تكون استعملت المشط أو الفرشاه بتاعته أو فرشاة الأسنان حتى لأنه ممكن ينتقل عن طريق أي خدش في الجلد مش بس بنقل الدم -زي الجراحين مثلا ما بيتصابوا بيه بسبب شكة ابرة بس- وطبعا المصاب ده لما مايعرفش مش هيروح ياخد علاج- وهو المطلوب على ماأظن لترشيد نفقات الدولة!!!!- وكمان هيبقى بؤرة عدوى متنقلة

أنا فهمت الفنية دة واقتنعت واتصدمت طبعا بحاجات ماكانتش على بالها ووعدتني انها هتبلغ المدير لأن علاقته بالموظفين كويسة وبيسمح بتبادل الآراء

أنا ماعرفتش لسة عملوا ايه

بس الموضوع لازم يبقى سياسة و نظام في الدولة كلها مش مكان يطبقه ومكان لأ حسب المزاج

ولازم يبقى في قانون يعاقب من لا يبلغ عن الحالات دي لأنهم قتلة

أنا عارفة اني طولت عليكم بس أستحلفكم بالله تبنوا الملف ده وخلوا نيتكم"من أحياها فكأنما أحيا الناس جميعا" وعلشان ربنا يفدينا احنا وكل حبايبنا والناس كلها ان شاء الله

نصيحة أخيرة بقى: ياريت كل الرجال والأولاد اللي بيروحوا يحلقوا شعرهم ياخدوا معاهم أدواتهم الخاصة

وياريت كل فرد يبقى ليه أدواته - الأب لوحده والأبن لوحده-حتى الفوط لأن الله أعلم مين فينا عنده ايه لأنها مابتتعرفش غير بالصدفة أو في الآخر

فياريت نحمي نفسنا ونحمي الآخرين

شكرا