نعم نريد أن نصبح أطباء لهم حقوق...و لكن ..ليس فوق أجساد مرضانا

http://www.facebook.com/notes/shymaa-mesalam/نعم-نريد-أن-نصبح-أطباء-لهم-حقوقو-لكن-ليس-فوق-أجساد-مرضانا/10150217933911802

الى كل زملائى الأعزاء..أيوة احنا تعبانينين و متبهدلين و متهانين فى البلد دى بقالنا سنين طويلة.... و كنت و زملائى فى أطباء بلا حقوق مم نادوا كثيرا بالتصعيد للمطالبة بحقوقنا جميعا كأطباء..بل و اتخذ فعلا قرار باضراب (يستثنى منه الطوارىء و الحالات الحرجة) فى جمعية عمومية فى فبراير 2008.. و لكن لغى د حمدى السيد قرار الاضراب بقرار فردى.. ثم كان اعتصام بالنقابة اعتراضا على تزييف ارادة الأطباء و ضرب عرض الحائط بمطالبهم و حقوقهم.. و تلاها اقرار حافز ال300% للنواب.. و مع استمرا المطالبات تم اقرار حافز 175% للاخصائيين فى 2010

الكلام ده بقوله لأنه احنا كنا من أول الناس اللى دعت الى اضراب.. و لكن اضراب زى ما متفق عليه فى مواثيق شرف المهنة و المواثيق الدولية .. و أهم من كل دول ميثاقنا حنا مع ضميرنا و نفسنا

هل أى طبيب ينادى دلوقتى بالاضراب..هل فكرت لو جالك عيان بينزف قصادك فى حادثة و بيموت..هتقف ساكت و تقول أنا عامل اضراب؟؟؟؟لو جالك واحد بأزمة قلبية أو تنفسية ...هتقوله مش هقدر أساعدك أصلى عامل اضراب؟؟؟بلاش لو جاتلك واحدة فى ولادة متعثرة و لو لم يتم التدخل دلوقتى.. على أحسن الفروض ممكن تفقد الجنين اللى فضلت مستنياه 9 شهور( و يمكن يكون أكتر لو كان حملها صعب مثلا)..هتقف تقول معهلش تعالى بكرة أصلى مضرب النهاردة؟؟؟ لو جاتلك أم بطفلها فى تشنجات من ارتفاع الحرارة ,, و اللى ممكن تعمله ضرر دائم بالمخ يسيب أثر يعمله عاهة تعيش معاه العمر كله..هتقولهم معلش عندى اضراب النهاردة؟؟؟؟؟

بلاش..هل حد فينا يضمن انه مفيش حد من عيلته أو معارفه يحصله..لا قدر الله..مشكلة طارئة فى اليوم ده.. و يكون بعيد عنك ,, و يكون أقرب مكان ليه مستشفى ..أطبائها عاملين اضراب ....هل هتبقى مرتاح لما يحصلهم حاجة لا قدر الله عشان مفيش حد ينجدهم؟؟؟؟؟؟

طيب احنا زهقنا و طهقنا و محدش سامع صوتنا و لازم نوريهم قيمتنا..عندكم حق..بس هل احنا قيمتنا فى شغل الطوراىء بس؟؟؟؟؟يعنى بذمتكم محدش فيكم مرة اتأخر عن العيادة لعذر ما..و أول ما جه شاف الناس قالبة الدنيا ازاى؟؟؟

اذا كنتم شايفين ان شغل الطوارىء و الرعاية بس هو اللى مهم و بيفرق مع الناس..يبقى نحول كلنا لتخصصات طوارىء بقى..ولا ايه؟؟؟

لازم نكون عارفين قيمة نفسنا كويس.. و أفكركم انهم ما يقدروش يقولوا اخبطوا راسكم فى الحيط لو عملنا اضراب جزئى يستثنى فيه الطوارىء و الحالات الحرجة..افتكروا معايا لما الصيادلة قرروا يضربوا جزئيا و يقفلوا صيدلياتهم(و ده كان بقرار جمعية عمومية على ما أتذكر و بمساندة نقابتهم على فكرة) اعتراضا على زيادة الضرائب عليهم بشكل مبالغ فيه..فاكرين ايه اللى حصل؟؟؟فضلت كام صيدلية فاتحة عشان الطوارىء.. و قعدوا بتوع الحكومة يهيجوا الناس عليهم فى الأول عن طريق الاعلام طبعا.. و بعدين قالوا برضه يخبطوا راسهم فى الحيط..لكن طبعا طبعا مع استمرارية الاضراب بالشكل ده(أعتقد انه قعد يومين أو تلاتة بالكتير.. و يا ريت حد يفكرنى بالظبط) اتلغت الضريبة.. و نجح الاضراب الجزئى

لكن أهم حاجة فيه هى انه كان فى كل بر مصر.. و ده الأهم...انه اذا اتفقنا على اضراب جزئى يستثنى منه الطوارىء و الحالات الحرجة..يكون فى عموم مستشفيات مصر.. و يستمر لحين اقرار مطالبنا..

لكن لأ لأ لأ لأ و مليووووووووووووووووووووووون لأ للاضراب الكلى..احنا مش هناخد حقوقنا على أجساد مرضانا.. و لا حد فينا يقدر يعيش و هو عارف انه السبب فى وفاة مريض لأنه لم يقم باسعافه بسبب اضرابه او بسبب دعوته للاضراب

أرجوكم...أرجوكم..افتكروا كويس أوى أوى لو أى حد من قرايبكم حصله حاجة و ملقاش حد ينجده..كل واحد دعى لاضراب كلى هيكون السبب فى اللى هيحصله

و الكلام ده مش من باب ان احنا ملايكة رحمة..ده من باب ان احنا بشر .. و ما ينفعش نفقد انسانيتنا و لا حتى الرحمة اللى ربنا سبحانه و تعالى رزقنا بيها..لأنه من لايرحم..لا يرحم..

و ساعتها حتى مش هنسوى الحيوانات ..اللى بتشيل بعضها بأسنانها لما حد منهم يتصاب عشان تسحبه لمكان أكثر أمانا