تعمل ايه يا بالطو يا ابيض؟؟؟؟ بقلم محمود رضوان

في السنين السودة ديّة
تعمل ايه يا بالطو يا ابيض
في وطن باع القضيّة
من زمان للعلم نفّض

يا وطن أرجوك سامحنا
أصلها غلطتنا احنا
لمّا و برجلينا رحنا
سكة اللي راح ما جاش

و اكتشفنا بعد فترة
انه مش زمن الدكاترة
قالو لينا انتو كترة
خلت الدستة ببلاش

حضرة السادة الأفاضل
لو في أصلا دم فاضل
عندكم مش عيب نناضل
لجل ما نقدر نعيش

و احنا في كل الوجود
الطريق مفروش ورود
و المزايا بدون حدود
و احترام زيّه مفيش

الّا في أرض الكنانة
اللي فيها الطب سبّة
شفنا ألوان المهانة
و الجريمة احنا أطبّا

مش لبستو بلاطي بيض
البسوا بقى بالعريض
و اللي جاي و ده أكيد
راح يكون بالطبع أسود
*****
في السنين السودة ديّة
تعمل ايه يا بالطو يا ابيض
في وطن باع القضيّة
من زمان للعلم نفّض
*****
قلنا ايه يعني حنتعب
في طريق أطول و أصعب
و ف نهايته البلية تلعب
كل حاجة تكون تمام

ناقص ايه تاني زيادة
كلّه حتجيبه الشهادة
العروسة و العيادة
و المكانة و الاحترام

عمر حد ما قال في مرّة
قد ايه أحوالنا مرّة
كناّ قلنا يا طب حمرة
كنّا كبّرنا الدماغ

تفرق ايه يعني البلاطي
في بلد للعلم عاطي
ظهره و مخليه يطاطي
ميساويش من أصله صاغ

و اسألك يا بالطو احنا
اختيارنا ليك غلط
ليه بجد ظلمنا روحنا
بيك و هل دا كان عبط

و يقولولك مستواك
و الدكاترة بتوع هناك
مهنتك عايزاك ملاك
و انت أصلا مش بتقبض
*****
في السنين السودة ديّة
تعمل ايه يا بالطو يا ابيض
في وطن باع القضية
من زمان للعلم نفّض
*****
بعد ما مققت عينك
في مذاكرة كلت سنينك
شيل زلط الله يعينك
و انسى وهم ان انت عالم

ما انت آخرك فيها افهم
شيفت فيكسد بيه بتحلم
أو مكان فيه رات و مينيمم
حتّى لو تحت السلالم

أو تدوّر ع البديل
فرصة في بلاد الكفيل
تحت امره تعيش ذليل
مر لكن ايه راميك

غير بلد مفيهاش مكان
ليك يا بالطو من زمان
حتّى شكر أو امتنان
ليه بتبخل بيه عليك

أو من الأول تهاجر
في دول تعرف تقدّر
أو ترب و تبقى تاجر
طب ايه يا عم كبّر

تعمل ايه يا بالطو فكرك
لمّا علمك يبقى وزرك
و امّا تلقى ان سعرك
كل يوم عمّال يخفّض
*****
في السنين السودة ديّة
تعمل ايه يا بالطو يا ابيض
في وطن باع القضيّة
من سنين للعلم نفّض
*******

بقلم
محمود رضوان