رسالة الى كل مواطن ....من قلب الجمعية العمومية ....والقرار باضراب الاطباء

http://www.facebook.com/notes/hoda-shorbagy/رسالة-الى-كل-مواطن-من-قلب-الجمعية-العمومية-والقرار-باضراب-الاطباء/10150174926833533

رسالة الى كل مواطن ....من قلب الجمعية العمومية ....والقرار باضراب الاطباء

منقول

رساله الى كل مواطن عادي مش فاهم ايه اللي بيحصل

بخصوص اضراب أطباء مصر بجميع المستشفيات الحكومية يوم 10 مايو الحالى والأضراب المفتوح بداية من 17 مايو عدا أقسام الطوارئ والحدوادث والعناية المركزة والحضانات والغسيل الكلوى

• أطباء مصر الشرفاء والشعب المصرى يد واحدة فى مواجهة فساد المنظومة الكامل الذى عانيتم وعانينا منه طوال السنوات السابقة ....ان الأوان لتفهموا مايحدث الأن

•

وأستكمالا لما طالب الشعب به من عدالة اجتماعية واهتمام بادميه المريض المصرى وحقوقة المنهارة تماما وأستكمالا لثورة أطباء مصر ضد الظلم والقهر والأستعباد للمريض والطبيب على حد سواء

• نوضح الاتى وبصيغة عامية -

•

•

•

1- الاضراب مش هيعرض حياتك للخطر زى ما انت متصور .. لأن كل الاجزاء الحيوية اللي ممكن العيان يتأثر بغيابها و لو بشكل بسيط فيها شغالة 24 ساعة مع الطبيب النوبنجى فى هذا القسم اللى برضه هوة طبيب و واحد مننا وجزء من ثورتنا فى الحفاظ على حق المرضى حتى اثناء غضبنا وثورتنا .. زي الاستقبال و الطوارئ في كل التخصصات و الحوادث و العناية المركزة و الغسيل الكلوي والحضانات ... لكن الاضراب سيكون في العيادات الخارجية؛ اللي هي حاجات اختيارية و ممكن تتأجل يوم؛ زي واحد عايز يكشف جلدية أو واحد عنده فتق بقاله 100 سنه سنة و قرر اخيرا

يكشف عليه أو واحدة جاية تتطمن علي البيبي اللي هينور الدنيا كمان 5 شهور

•

•

2- احنا موصلناش للاضراب كده فجأة .. احنا بقالنا 3 سنين بننادي بعلو صوتنا و ياما عملنا وقفات و احتجاجات بس محدش كان معبرنا .....ياما حصلت مصايب وكوارث بالمستشفيات للمرضى والأطباء على حد سواء..... حتي حكومة شرف مرضيتش تسمعنا اصلا مع انهم سمعوا طوب الارض .. و بعد محايلة و خناق ادونا نص ساعة نتكلم و قالولنا طب خلاص .. فوت علينا بكره .. قمة الاستهتار و عدم الاحترام لينا .. مع اننا مطلبناش غير انهم يحطونا في الاعتبار وقت ما ربنا يفرجها .. معملناش زي الشرطة و البنوك و قلنا عايزين فلوسنا دلوقتي

الاضراب ضد التجاهل و عدم الاحترام .. مش علشان الفلوس

•

•

3- أول اهداف الاضراب هو تأمين المستشفيات وهذا المطلب حتمى وضرورى لأعطاء الحد الأدنى من الخدمة الصحية على الأقل ..واحنا شوفنا فى الأيام اللى فاتت ان الدكاترة والمرضى بيدفعوا تمن البلطجة دى فى المستشفيات ومع احترامى لكل الناس اللى بتقول ان البلطجة دى موجودة فكل حتة ...احب اقولة اةة طبعا موجودة فى كل حتة ....بس تعالى بص فى كل محافظة على الأماكن الحيوية بتاعتها زى الكهرباء والميه والشرطة والمحافظة والبريد والبنوك والماتشات واللى واللى .... مش معقولة يأمنوا ماتش الكورة و يسيبوا الناس تنضرب و تنقتل قدامنا في المستشفي زي ما حصل في المطرية و غيرها كتير فى كل محافظات مصر وبصورة تكاد تكون منظمة ...... أصل البلطجى اللى حابب ينتقم من النظام بيلاقى كل الأمكان الحكومية والحيوية متأمنه كويس ....فبيروح يطلع غله من مستشفيات المرضى الغلابة والدكاترة اللى واقفين حائط صد وعزل وبدون حماية لنفسهم .. و علي فكرة الداخلية و الجيش واصل لهم الطلب ده من زمان و محدش اتحرك برده الا فى اوقات معينة لما بتحصل مصيبة

•

•

•

4- تاني الاهداف هو زيادة ميزانية الصحة في الموازنة الجاية عشان متجيش بتنزف في الاستقبال و أقولك روح هات حقنة أو قطن من بره أو اديك ورقة واقولك معلش اطلع بس جيب العلاج دة من برة عشان مفيش هنا ..وتبقى انت حضرتك متخيل ان انا معايا العلاج ومخبيه عنك ....وانت مش حاسس ان انا كل الكابة اللى على وشى مش منك انت ....لالا دة عشان انت بتكون صعبان عليا لان انا مش بأيدى حاجة اعملهالك غير انى اكتبلك العلاج اللى تجيبه من برة بفلوسك على الرغم من ان حقك تتعالج فى المستشفى بعلاج مجانى او بسعر رمزى والعلاج يكون مفيد وصحيح مش علاج صورى على ورق والأسم كتبتلك علاج والسلام.... الصحة في مصر بتاخد 3% من الموازنة و في أي دولة متخلفة مفيهاش وزارة صحة اصلا بتلاقي الصحة واخدة 7% علي الأقل دة لأن حياة الأنسان برة تسوى كتير أوى ..لكن حياه البنى ادم هنا رخيصة اوى وانتوا عارفين كدة كويس اوى

5- ثالث اهداف الاضراب اقالة وزير الصحة و شلة الحرامية اللي ماسكين الوزارة من سنين .. معرفش ليه مصممين يجيبوا وزير تبع الحزب الوطني اللى دمر البلد وقعد يخرب فيها وينهبها .. يعني شالوا الجبلي و جابوا سامح فريد اللي بعت عربيات الاسعاف تموت الناس .. قولنا مش عايزينه جابوا اشرف حاتم اللي كان مطلع العربيات بنفسه و اللي كان خارب القصر العيني و مطلع عين الدكاترة فيه.....الشرفاء فى وزارة الصحة وأساتذة الجامعات يا اعزائى لا يسعون للمناصب والشرفاء موجودين لكن الحرامية كانوا مغطيين على البلد فى كل المجالات ... هو

الموضوع عند وزارة الصحة حتى الان ملهوش علاقة بالثورة!!!!

•

•

6- رابع مطلب هو اعادة هيكلة اجور الاطباء والعاملين فى الحقل الصحى .. و تحديدا شباب الاطباء (( و دول غير الناس اللي حضرتك بتروح تدفع لهم 150 جنيه في الكشف )) ... دول الناس اللي لسه متخرجين من الكلية و مكتوب عليهم يقعدوا 8 سنين علي الأقل شايلين كل الشغل في المستشفيات والحدات الصحية فى الصحراء والريف وادغال الجبال و اجمالي اللي بيقبضوه من مرتب وحوافز وبدلات و نبطشيات من 350 لــ 700 جنيه دة لو ربنا نفخ فى صورته ... و مينفعش يفتحوا عيادة لانهم لسه مخلصوش ماجيستير وممكن يضيع مستقبله لو عمل كدة ... و مينفعش يزوغوا لانهم قاعدين مكان الدكاترة الكبار فى النوبتجيه اللي حضرتك بتروحلهم العيادة تدفع 150 جنيه في حاجة متستاهلش ...عشان كدة لما بتجيلى المستشفى العام بتلاقينى انا ...الطبيب الشاب اللى بستقبلك وببقى شايل همك جوايا وساكت لانى بشوف زيك فى اليوم ألف واحد تعبان ومش قادر اساعدة بجد مساعدة طبيه حقيقية راقية .. لان الراجل الخريج ده محدش مديله فرصة يتعلم و يعالجك ببلاش في المستشفي

•

•

•

7- زيادة الأجور دي مش مطلب محدد القيمة أو الوقت .. يعني احنا بنقول حطونا في مكاننا الصح في أقرب تعديل .. لو الشريحة الاولي هتاخد 500 جنيه بس مفيش مشكلة ...لو الشريحة الأولى هتاخد 100 جنية بس ...مفيش مشكله و من اول 2013 لان ظروف البلد متسمحش غير بكده .. احنا اول ناس موافقين.... و احنا اصلا قدمنا دراسة اقتصادية لأعادة توزيع مرتبات الاطباء في وزارة الصحة بالقيمة الحالية في الميزانية .. يعني تخلينا ما

نحتاجش مليم زيادة من ميزانية الدولة .. بس الناس الكبيرة مش هتسيبنا ناخد منهم الملايين اللي بيلهفوها كل شهر

•

•

•

8- ليه الشريحة الأولي ؟؟؟ مش هقولك علشان احنا اشطر ناس و لا علشان احنا صفوة المجتمع و لا الكلام ده...احنا ناس منكم ومن أسركم وعائلاتكم .... ... أنا اول مرتب انا هقبضه بيكون عمري 26 سنة .. يعني زميلي اللي دخل اي مجال تاني فى أى وظيفة او مهنه اخرى مخلص دراسة و شغال بقاله 5 سنين .. فلازم يبقي فيه مقابل للعمر اللي ضاع مني ده ....مقابل للسنين اللى درست فيها علم وسهرت عشان احصله .

و الموضوع ده مش بدعة .. الجيش بيعمل كده معانا .. انا لما اقدم اكاديمية و اتطوع في الجيش بيساويني في الرتبة و المرتب بزميلي اللي في سني .. يعني أول شغلي تقريبا بأكون نقيب لان اللي عنده 26 سنة بيكون وصل للرتبة دي

غير ان انا باشتغل 60 ساعة في الاسبوع علي الأقل .. و انا باتكلم علي الممارس العام و الطبيب المقيم اللي بيشيل الشغل كله و مينفعش يفتح عيادة اصلا .. معظم الناس بتشتغل من 35 لــ 45 ساعة بس و بيأجزوا في العيد و انا بسيب اهلي و اروح اقعد في المستشفي علشان لو حد اتعور اخيطه ...لو كارثة حصلت انا أول واحد بقف ليها حائط صد مسئول عن واجبى.. و لا اركب له محلول و معاه حقنتين يلحقو العيان اللى جاى يصوت من الألم ......عمرك شفت دكتور قاعد يكشف على عيانين 24 ساعة فى اليوم من غير ماينام دقيقة ؟؟؟؟؟؟ تفتكر فى الساعة العشرين من اليوم هيعرف يديك حقك كعيان؟؟؟ تفتكر الطب ينفع فيه كدة ؟؟؟؟؟ تفتكر ينفع طبيب مجهد جدا ولاينام ولايأكل احيانا انه يحافظ على صحتك ويساعدك على تحمل الامك ...فكر فيها كدة ....

دا غير فيروس سي و الامراض التانية اللي لازم و حتما و لابد هتلقط منها حاجة .. احنا بناخد بدل عدوي 19 جنيه و فيه ناس تانية ملهاش علاقة بالمرضي نهائي و شغلها في المكاتب و بتاخد 450 جنيه

•

و حاجة تانية مهمة .. كل دول العالم المتقدمة بتحط الطبيب في اول شريحة لان حياة الناس امن قومي و لازم المسئول عنها يبقي مستعد يحافظ عليها بشكل فعال .. مش بيتنطط طول الاسبوع في المستوصفات علشان يقسم الــ 50 جنيه ايراد اليوم مع صاحب المستوصف

•

•

9- الناس اللي بتقول الدكاترة اللي في مصر اي كلام اصلا و ميستحقوش الزيادة ... أنا موافق علي كلامك ومش هناقشك فيه .. عارف ليه ؟؟؟

لان الدكاترة الشاطرة اللي بتفهم وعارفة قيمه العلم اللى اتعلمتة وتعبت عشان تتعلمه مبيعرفوش يعيشوا بالمرتبات اللي هنا دي ...مبيعرفوش يكونوا جنود للدفاع عنك وقت ماهتبقى محتاج هم جنبك .. فبيسيبوا البلد و يطفشوا علشان يدورا علي مكان يحافظ علي كرامتهم ومكانه علمهم اللى درسوه و يديهم فرصة يستمروا في تعليمهم علشان يطوروا نفسهم لان الكلام ده مكلف جدا فوق ماتتخيل ........دارسة الطب فى مصر يا اعزائى مكلفة جدا ..

الدكتور المصري بره بيفضل يذاكر و يمتحن لغاية ما يموت وبيبقى أشطر الدكاترة هناك ....سواء فى الخليج او امريكا او استراليا او كندا او اوروبا وفيه اللف النماذج من أطباء مصر فى كل دول العالم ....الفئة الوحيد اللى أثبتت كفائتها فى كل دول العالم ماعدا بلدهم ........تفتكروا العيب فين ؟؟؟؟ .. احنا المهنة الوحيدة اللي بتعمل مؤتمرات علمية طول السنة و ناس كتير بتحضرها

•

•

اكيد محدش عايز يبقي وحش و فاشل بمزاجه ...محدش حاطط جزمة قديمة فى بقه وراضى .. بس لما تلاقي نفسك مستلف من ابوك تمن البنطلون اللي اشتريته من التوحيد و النور مش هتفكر تشتري مرجع بــ 300 جنيه او تحضر ماجستير بكام ألف جنيه أو تحضر مؤتمر يومين في القاهرة بــ 500 جنيه

•

•

•

• وأخيرا ...عاوز افكركم بحاجة ......فاكرين أيام الثورة ....لما الناس كانت بتتصاب ....فاكرين وقفتنا كانت أزاى ....كنا جدعان وأد المسئولية ...كلنا كنا فى المستشفيات واللى مكنش فينا فى المستشفى بتاعتة كان فى الميدان فى المستشفى الميدانى ...طبعا مش كلنا .. بس على الأقل احنا نفس الفئة اللى عملنا كدة وبنتشرف بكدا وهنفضل طول عمرنا بننادى بأحياء الطب فى مصر وبناء نهضة الصحة فى مصر فى كل المجالات

•

•

• المريض المصرى اعظم بكثير انه يتهان كل يوم 1000 مرة واحنا واقفين ساكتين

• والطبيب المصرى اعظم بكثير انه يتهان كل يوم 1000 مرة واحنا واقففين ساكتين

متعة الرسالة اللى ربنا ميزنا بيها انك تساعد الناس وتريح تعبهم وتزيل الامهم ملهاش تمن .. بس متجبروش الدكاترة انهم يتنازلوا عنها علشان يقدروا يعيشوا حياة كريمة

اسفين ....من النهردة مش هنكون ساكتين

شباب اطباء مصر الشرفاء

ورساله الى اخوانهم المواطنين خارج المستشفيات

2 – 5 - 2011

منقول