إعتراضات وأجوبة حول إضراب الأطباء

http://www.facebook.com/notes/ahmd-hamd/إعتراضات-وأجوبة-حول-إضراب-الأطباء/10150238887941584

إعتراضات وأجوبة حول إضراب الأطباء

من واقع كلامنا مع الناس وبالرغم من أن الغالبية تريد الإضراب وتؤيده إلا أن هناك بعضا من الأطباء وغير الأطباء يعترضون على الإضراب ويتساءلون أسئلة يرجع أغلبها إلى عدم المتابعة الجيدة لما حدث في الفترة الأخيرة من تطورات أدت إلى قرار الإضراب منها :

1- إحنا ضد المطالب الفئوية والأطباء هم أرقى طبقات المجتمع ومش مفروض إنهم يعملوا زي الفئات اللي بيعملوا إضراب دلوقتي

2- البلد مش مستحملة إضرابات ولسة بدري على ماالأمور تتظبط نصبر شوية لحد لما يبقى فيه مجلس شعب ورئيس جمهورية

3- دي آخر خطوة في الخطوات ولازم الأول نتكلم مع الحكومة ونتفاوض معاهم قبل مانعمل إضراب زي ده

4- الناس اللي جاية المستشفيات في اليوم ده نسيبها تموت احنا مهنة إنسانية ومش مفروض نعمل إضراب ونضر بصحة المرضى

5- فيه حالات كتيير بتصرف علاج ومش معقولة نعطلها عشان الإضراب

6-

1- إحنا ضد المطالب الفئوية والأطباء هم أرقى طبقات المجتمع ومش مفروض إنهم يعملوا زي اللي الفئات بيعملوا إضراب دلوقتي

ج - أولا : مطالب الأطباء ليست مطالب فئوية بل على عكس الجميع مطالب الأطباء هي مطالب عامة للشعب المصري كله . مطالبنا هي تحسين الخدمة الصحية المقدمة للمواطن المصري وكما هو معروف أن الصحة هي أغلى مايملكه الإنسان والإرتقاء بالرعاية الصحية هو الطريق لتقدم الأمم

مطالبنا مطالب عامة لجموع الشعب المصري تتمثل في :

أ‌- رفع ميزانية الصحة إلى 15 % من الميزانية العامة أيا كانت سواء قلت أو زادت فلا علاقة للنسبة بدخل البلد والنسبة دي هي حسب توصيات الإتفاقيات الدولية الموقعة عليها مصر وتوصيات منظمة الصحة العالمية لأن الصحة عندهم تستحق أن تكون نسبتها 15 % والنظام البائد ماكانش بيهتم بصحة المجتمع لأنه ماكانش يفرق معاه صحة الناس أصلا لكن بعد الثورة الوضع إختلف وصحة المواطنين فوق كل إعتبار .

ب‌- توفير أمن في المستشفيات عشان الدكاترة يعرفوا يشتغلوا وعشان العيان اللي جاي يقدر يتعالج صح في جو آمن بدل من تحول المستشفيات إلى ساحة معارك هيقولوا البلد كلها مفيهاش أمن هنقول حتى لو البلد كلها مفيهاش أمن لازم المستشفيات يكون فيها أمن لأن المستشفيات مش زي أي حاجة تانية المستشفيات هي اللي بتعالج الناس ولازم تكون محمية ولازم الدكاترة يكونوا محميين كويس وإزاي تكون حماية ماتشات الكورة أهم من أمن المستشفيات ؟

ت‌- إقالة وزير الصحة : هيرد واحد ويقول مانصبر عليه شوية طب ماهو دي حكومة إنتقالية ونصبر لحد لما تتغير

ج - احنا كنا نتمنى إننا نقدر نصبر لحد التغيير الوزاري القادم لكن أولا إقالة وزير الصحة هي إستكمال لتغيير كل رموز النظام السابق وليست إقالة الوزير فقط ولكن كل قيادات الوزارة المسؤولين عن القرارات الفاسدة والتي دمرت القطاع الصحي وإن إقالته هي إستكمال للثورة التي من الواضح أنها لم تصل بعد إلى وزارة الصحة

إقالة الوزير نظرا لإستمرار نفس السياسات بعد الثورة والتي أدت إلى إحباط الناس وإحساسهم بأن الثورة لم تأت بجديد

إقالة الوزير نظرا لخطورة المرحلة الموجود فيها هذا الوزير وخطورة السياسات التي ستؤثر على مستقبل الصحة في مصر لسنين قادمة

إقالة الوزير نظرا لسجله الحافل في أثناء الثورة حينما كان مديرا لمستشفيات القصر العيني في رفض إعطاء شهادات وفاة لشهداء الثورة تبين قتلهم وليس وفاة طبيعية

إقالة الوزير لأنه ليس من المعقول أن تقوم ثورة وتتم مكافأة من كان يناهض الثورة والثوار بأن يتم جعله وزيرا

إقالة الوزير لأننا نريد وزيرا يغير من سياسات الصحة الموجودة حاليا والتي تدمر الصحة ولخطورة المرحلة وأهمية قطاع الصحة فمن الواجب أن يكون الوزير في هذه المرحلة الحرجة ذو مواصفات خاصة تمكنه من جعل القطاع الصحي يؤدي واجبه على أكمل وجه في هذه المرحلة الخطيرة

وليس وزير كان بالأمس يقف ضد الثورة ومازال يساهم بسياساته في تدمير القطاع الصحي والبلد مش مستحملة

ث – هيكل عادل للأجور ووضع الأطباء في الشريحة الأولى :

هتقول مطالب فئوية اهوه هنقول إننا نطالب بهيكلة عادلة للأجور لكل العاملين بالدولة وليس للأطباء فقط وأن يتم توزيع الدخل القومي للبلد بالعدل على العاملين بالدولة دون أن نفاجأ بأن هناك من يأخذون عشرات ومئات الآلاف ومن لايجدون الملاليم التي تمكنهم من العيش حياة كريمة

مطلبنا هو مطلب رئيسي من مطالب الثورة وهو عدالة إجتماعية وعدالة توزيع الثروة

وده من الأسباب الرئيسية اللي الثورة قامت عشانه

التقسيم العادل للدخل أيا كان فمحدش يقول هيجيبوا منيين إحنا بنطالب بتقسيم الموجود قسمة العدل وليس زيادة مرتبات الأطباء وخلاص لو المرتبات في الدولة كلها هتنقص إحنا موافقين بس تتم مسواتنا بالفئة التي تناسبنا في الأجور مش نلاقي دبلوم أو عامل في بنك أو في شركة بترول بيقبض أكتر من الطبيب

2- البلد مش مستحملةإضرابات ولسة بدري على ماالأمور تتظبط نصبر شوية لحد لما يبقى فيه مجلس شعب ورئيس جمهورية

ج – إضراب الأطباء هو إضراب رمزي ومطالبنا هي قبل ما يكون فيه هيكلة للأجور دون مشاورة للأطباء فيه كما أن حال البلد الآن فعلا مش مستحمل وأهم حاجة في البلد دلوقتي بالإضافة إلى الأمن هو الصحة كمافي المقولة (إننا بلد فقير فيجب أن نستثمر في الصحة والعلم ) وحال المستشفيات الحكومية عموما لايخفى على أحد ماوصل إليه من سوء وخاصة في فترة مابعد الثورة

3- دي آخر خطوة في الخطوات ولازم الأول نتكلم مع الحكومة ونتفاوض معاهم قبل مانعمل إضراب زي ده

ج – لو حضرتك متابع تطورات الأحداث من البداية هتعرف إن كان فيه جمعية عمومية يوم 25 مارس وتوصيات بأن يكون فيه لجنة للتفاوض مع رئيس الوزراء وبعد معاناة تمت مقابلة رئيس الوزراء الذي تعاطف مع مطالب الأطباء ووعد بحل معظمها وأحالنا إلى وزير المالية كي يتم التنسيق معه ولكن حتى الآن لم يتصل أحد بلجنة التفاوض أو التنسيق معهم فيما يخص مطالبهم سواء المادية منها أو الإدارية مثل توفير أمن في المستفيات وإقالة وزير الصحة

وكنا ننتظر حضور رئيس الوزراء أو إلقائه خطابا يطمئن الأطباء حول وضع الصحة في مصر ولكن لم يحدث هذا وتم التجاهل التام لمطالب الأطباء المتمثلة في مطالب الجمعية العمومية لنقابة الأطباء

وبالتالي فخطوة الإضراب سبقتها مفاوضات وطلبات كثيرة بالتفاوض وبإعارة مطالبنا أي إهتمام من أجل مستوى الصحة في مصر أولا ومستوى مقدمي الخدمة الصحية في مصر ثانيا

4- الناس اللي جاية المستشفيات في اليوم ده نسيبها تموت احنا مهنة إنسانية ومش مفروض نعمل إضراب ونضر بصحة المرضى

ج – لو حضرتك ركزت كويس في كيفية تنفيذ إضراب الأطباء هتجد إن الإضراب لن يمس الإستقبال أو الحالات الحرجة والطواريء وإن الإضراب يشمل فقط الحالات التي من الممكن تأجيلها إلى أي يوم آخر تماما كما يحدث في أي يوم إجازة مثل يوم الجمعة أو عيد العمال مثلا

إذن لا إضرار بصحة المرضى على الإطلاق بل على العكس مطالبنا من أجل صحة المرضى أولا وأخيرا

وإضراب الأطباء ليس بدعة يبتدعها أطباء مصر بل على العكس موجود في كثير من الدول العربية والغربية وله بروتوكلات معروفة تضمن عدم الإخلال بأخلاق المهنة ورسالتها السامية

5- فيه حالات كتيير بتصرف علاج ومش معقولة نعطلها عشان الإضراب

ج - أولا الناس دول هيكونوا عارفين من قبلها ومن دلوقتي واحنا اهوه بنعرف الناس إن يوم 10 مايو هيكون إضراب عام للأطباء فالناس مفروض هتعمل حسابها زي مابتعمل حساب أيام الأعياد زي يوم الجمعة ويوم عيد العمال وغيرهم

ثانيا تعطيل صرف العلاج : إن العلاج ممكن يتصرف في أي يوم آخر لأنه مش حاجة مستعجلة والهدف اللي من أجله اتعمل الإضراب يخلينا نستحمل تاجيل صرف العلاج يوم كمان لأن الهدف هو توفر هذا العلاج فعلا بنوعية وكمية تليق وتلبي إحتياجات المرضى لكن العلاج اللي بتتكلم عنه ده أغلبه مابيكونش موجود أصلا ومش هيحصل حاجة لما يتأجل يوم كمان

د/ أحمد حامد