مش هلبس البالطو الأبيض
أنا ممتنعة عمدا عن لبس البالطو
ما دام ده التقييم الوحيد اللي وزارة الصحة تعرفه لأداء الطبيب
طالما ممكن آخذ الحوافز بتاعتي أو ما أخدهاش حسب لبسي للبالطو
ولما تبقى الوزارة تعمل اللي عليها ناحية المرضى وناحيتي تبقى تديني أوامر ومن حقها تقيمني
مش لما أبقى أنا شايفة شغلى أحسن من الوزير وأنا مش مقصرة في شغلى والوزير اللي مقصر ييجي يحاسبني
لما يعملوا اللي عليهم الأول يبقوا يتنططوا ويدوا أوامر زي ماهم عاوزين
الوزارة بتحاسبني لما بتشوفني مقصرة " من وجهة نظرهم"
طيب مين اللي بيحاسب الوزارة على جرائمها ؟؟؟
الوزارة شايفة إن العيان ممكن تجيله صدمة عصبية لو دخل مالقانيش لابسة البالطو
وبناء عليه لابد من ردعي لأكون عبرة لأمثالي ممن يتهاونون بأرواح البشر
" ويهددوا السلم العام بالمرة"
إنما عاااااااادي جدا موت أطفال المطرية
وعاااادي جدا عدم وجود العلاج اللي المريض بيحتاجه
وعااااادي جدا عدم وجود أدوية الطواريء "life saving medications"
وحصلت معايا شخصيا : كان في تفتيش في نوبتجيتي ومارضيتش ألبس البالطو "مع إنه كان موجود"
وقلت للمفتشة لما بتكلمني على البالطو : الأولى تفتشوا على الأدوية اللي مش موجودة
العيان عاوز لما ييجي يلاقي علاجه مش عاوز يشوفني بالبالطو
قالتلي: ماليش دعوة....إشتكي
قلتلها: اشتكيت قبل كده فعلا " رسميا" في تفتيش سابق وماحصلش حاجة
ولا يخفى عليكم طبعا إن التفتيش على زي الأطباء والممرضات مش حرص من الوزارة علىال perfection في الخدمة الطبية
ده " لقص الحوافز" اللي مجنناهم بس
يعني النية "أذية مش خير"
وأنا بقى مش لابسة البالطو غير لو الناس اللي طلبت مني ألبسه
أنا بشتغل عند الناس مش عند الوزير
والناس هي اللي بتدفعلي مرتبي مش الوزير
وعليه........
يوفروا أوامرهم على نفسهم
مش هعمل غير اللي في مصلحة العيان واللي العيان يطلبه
وبس
==========================
مش لابس البالطو الابيض هايسخطوك يا قرد
منذ زمن ليس بقليل امتنعت فعليا عن لبس البالطو الابيض
البالطو ده ابويا اللى جابهولى هو الوحيد اللى من حقه يشوفنى بيه
الوزاره اللى ملهاش لازمه بتسلم التمريض والعمال زى
وبتيجى عند الطبيب وتقول هو لازم يشترى
ده من كت الفلوس اللى بناخدها
وكل ما يجى تفتيش ويسألنى عن البالطو
اقول محدش سلمنى حاجه
يقولو مفيش اطباء بيستلمو بلاطى
المفروض هما اللى يشتروه
المهم من غير ما اطول
انا كان اعتراضى فى الاول
على انهم مادام مابيدوناش بلاطى
يبقى مش من حقهم يسألونا عليها
بس انا دلوقتى حتى لو سلمونا البلاطى مش هالبسها خاصة والتفتيش موجود
العجيبه انهم ما بيسألوش عن خوافض اللسان
ولا الجوانتيات
ولا الادويه الناقصه
ولا كفائة شغلنا
ولا حتى ان كنا بنعرف نشتغل ولا لأ
المهم عند سعادة البيه الوزير المحترم
المظهر
البالطو والجرافت
عشان التلفزيون لما يجى يصور
يلاقى الاشكال سمحه وبشوشه
يعنى راضيه
ماهو الشياكه دليل الاكتفاء
والبشاشه دليل الرضا
يبقى ملكوش حق فى اى حاجه
ونردد الجمله الازليه
كله تمام يا ريس
انا كمان ممتنع عن لبس البالطو فى وجود التفتيش
وهارفع شعار
هايسخطوك يا قرد
======================
اقولكم اخر الاخبار اللى عندى
قبل ما انسى وانتو كمان تنسو اولا انا طبيب اسنان لكن انسان
يعنى من ابو 30% بس
المهم عندنا فى المنطقه الصحيه طلعو قرار يلغى قرار وزير الصحه اللى اصلا ملوش لازمه
جوم من يومين كده وقالو ان التلتين فى الميه دى هاتلغى ال75% الاولى بتاعت المحليات
يعنى والحمد لله احنا سحبو مننا فلوس ما زودوناش
كمان الناس التنيين المحظوظين بالسم بس من غير ما يقبضوا
قصدى بتوع ال 150% هايصفصف اللى هايخدوه زياده 75% بس
بالاضافه ان احنا اصلا ملناش تقييم
ولما عملت شكوى وروحت بيها المديريه للشئون الماليه والاداريه
مرضيوش يبصو فيها
وقالولى روح بيها الحسابات
روحت بيها الحسابات عشان يحققوا
ما رضيوش يستلموها رسمى ويمضولى انهم استلموا الاصل
عشان مش عاوزيين وجع دماغ
ولقيت الموضوع مطبخ الاداريين مع بعضهم قرروا يقرفوا الاطباء عشان الحافز ده اللى هو اصلا ماصرفش لغاية الان هما مالهومش فيه وقالوا ان الحافز ده بيلغى الحوافز اللى قبليه
على عكس ما سيادة الوزير المحترم قال
المهم انا زهقت ورمضان جاى انا هاوحد الدعاء كل يوم عند اذان المغرب بالدعاء على ........
المره دى مش على اليهود
هايكون الدعاء على اعداء الوطن الداخليين
على اللى ممرمطينا وزلين انفاسنا
مع اننا والله اتربنا كويس ومش محتاجين تربيه من اول وجديد
معلش تقلت عليكو
بس فى النهايه انا على قرارى مش لابس البالطو
وهارفع الشعار هايسخطوك يا قرد
فية اية يا جماعة انتوا متحاملين على الوزارة لية اصل دي لها اهداف وهي زل الطبيب ولازم تجيبنا كلنا الارض وكدة هي بتحقق اهدافها ربنا يخليهم لينا كمان وكمان واللي مربهوش ابوة وامة تربيه وزارة الصحة اسف على التعبير ويجعلة عامر
توقيع
طبيب مزلول
=========================
انا مع الجماعه فى وقافتهم الاحتجاجيه وسلك كل المسالك الشرعيه والقانونيه لنيل الحقوق
اما دعائى عليهم فهذا من سبيل التدعيم وليس التوكل
والا كنا اخذنا كل حقوقنا بالدعاء والجلوس فى دور العباده والتوسل الى الله فقط
انا سأكتب تلك الشكاوى وانا معكم فيها وسأ رسل بصفه فرديه وبصفه جماعيه من خلالكم ومن خلال مجموعات اخرى
الى الاعلاميين والمختصين
ولكنى كنت فقط ادعم هذا اننى لن اقبل بحقوقى فقط ولكن وبعد هذا الذل لهم با يعطونا جزءا من حقوقنا وكأننا نشحت منهم
وكأنها اموال الميراث تبعهم
وكأنها ابعدية اهاليهم
التى نعمل فيها بالسخره
فقط بقوت ضئيل نتقاضاه فقط حتى نستطيع العيش ولا نموت
حتى يسخرونا مرة أخرى للعمل فى اليوم التالى
فقررت ان يكون الله عليهم وفى اموالهم بالدعاء عليهم
بالاضافه لأخذ حقوقنا قانونا وشرعا أو .........
وكل وشعب مصر بخير
على فكره يا جماعه انا كان نفسى انى احضر المحكمه بس انا خارج القاهره فى مأموريه
وقلبى وربنا معاكو
ان شاء الله المرات القادمه هاكون موجود
وقبل ما انسى برضو مش لابس البالطو الابيض
وهارفع الشعار
هايسخطوك يا قرد
============================
سؤال الى معالى رئيس الوزراء الذى حضر أصدار القرار مع معالى وزير الصحة
1- كم يبلغ مرتب أصغر موظف فى القرية الذكية سكرتير مثلا أو موظف يرد على التليفونات يعنى بدون أى قدرات خاصة
2-كم يبلغ مرتب أصغر موظف فى الصندوق الأجتماعى للتنمية
3 كم يبلغ مرتب أصغر موظف فى مركز المعلومات؟؟؟
الأجابة عدة ألاف من الجنيهات
أما نحن فالحكومة الموقرة ترى أن العشرة بقرش...نستقبل الكوارث و الحوادث و نعمل أيام السبت و الجمعة و الأعياد و نوبتجيات 24 ساعة و نذهب للتحقيق معنا فى النيابة العامة عند حدوث خطأ و المحصلة صفررررررررررر لم نعد قادرين على تحمل هذا الظلم البين لابد من العدل بين كل الفئات العاملة فى حكومة واحدة
أتقوا الله فى الأطباء ...و أتقوا الله فى الممرضات
===============================
يا جماعة انا بقالي 6 شهور بس في التكليف و مكنتش متخيلة ان الوضع سيىء للدرجة دى
انا تكليفي في حلوان
غير موضوع النبطشيات اللي مصصممين انها تكون 24 ساعة لانهم بيدوا عليها بدل راحة يوم واحد و لو طالبت بغير كده بيقولوا لك هات القرار اللي يثبت اللي بتقولوه وغير الغلب اللي الواحد بيشوفوا كل يوم في المواصلات لاني من سكان القاهرة و طبعا محدش مقدر وكل يوم باتاخد تأخير كل يوم و غير مكتب الصحة اللي ماكنش علي البال ابدا و اللي شايلين همه كل نوبتاجية المهم حتي كمان موضوع ال75% مش فاهمين له حل احنا اخدناه مرة واحدة بس و بعدين قالوا هيتلغي و سمعنا كلام غريب قوى عن انها اتلغت علشان بتوع 15 مايو اشتكوا انهم موصلتهمش يقوم المسئول بدل ما يديها لهم يلغيها علينا كلنا مش كده وبس ده كمان ال75% اللي اخدناها هتتخصم من التقييم اللي جاى انا بجد مش فاهمة ايه اللي لينا زى مانكون بنشحت بالظبط ده كما لما تسأل الموظفين تلاقيهم بيقولوا لك بمنتهى البجاهة انتوا عايزين تاخدوا الاتنين ال 150% و ال75% زى مانكون بنفترى عليهم او كأنهم بيدفعوا الفلوس من جيبهم و مش واخدين بالهم ابدا ان الفلوس اللي بندفعها في المواصلات اكتر من المرتب اصلا والنوبتجية ال 24 ساعة بتاعته واللي بناخد عليها 7 جنيه بنصرف فيها قدهم تلات مرات و طبعا النيابات في علم الغيب بجد كتير مننا بيفكر في الاستقالة بسبب الوضع المهين ده و بجد لو كنا نعرف ده لا كنا دخلنا طب و لا سمحنا لنفسنا بالبهدلة دى
============================
يا جماعه واللة انا حزين بسبب كوني طبيب وحزين اكتر على خيبة امل اهلي في كانوا فاكرين لما اتخرج وابقى دكتور هاسعدهم واسعدهم والعكس حصل بقى حتى والدي هو
اللي بيساعدني وصعبان عليه وعليا حالي انا فعلا حزين بقى الطبيب اقل من في المجتمع واي دولة في العالم تعرف يعني اية طبيب الا دولتنا المصونة دة فعلا حرام وكأننا بنشحت من الوزارة ولما تقول لحد على مرتبك يتريق عليك خلاص يا جماعة الطبيب انتهى في مصر واللة لو ليا اخ لا اتمنى ابدا ان يصبح طبيب مثلي يستعطي ويطلب المساعدة وعجبي
=================================
والله يا جماعه كلنا حزانا على اوضاعنا المهينه
من كام يوم جت حلقه للمذيع محمود سعد وهو بيتصعب على عمال النظافه فى الشارع (الزبالين
وبيقول والله الناس دول يصعبوا على اى حد ومحدش يتردد انه يساعدهم
الناس دول بيخدو مرتب 300-400 جنيه
المبلغ ده يعمل ايه
الكلام خلص للراجل الاعلامى
الراجل الاعلامى ده عمرى ما شوفته اتصعب على اللى درس سبع سنين
وفى الاخر مرتبه اقل من زبال فى الشارع
مع كل الاحترام لعمال الشوارع وغيرهم من العمال
يا جماعه احنا بقينا مسخة المجتمع
احنا بره مصر قى الخليج تحديدا الناس بتتريقأ علينا
اللى بيسافر بياخدله 3000- 4000
يعنى تقريبا عشرة اضعاف مرتبه هنا
طبعا ده حلم لينا كلنا
الطبيب الخليجى(اللى بيشتغل فى الحكومه برضه ) بقه بيخدله كام
عشرة اضعاف الطبيب المصرى هناك
احسبوها على مهلكو
الموظف الحكومى فى اى بلد فى الدنيا ما بيحتجش يمد ايده لحد
احنا هنا بنشحت
وفى لاخر هعاوزنى البس بلطو وابتسم فى وش العيان وخاصة لو فيه تفتيش
ونرجع نقول
كله تمام يا ريس
ولغاية النهارده مشكلة حوافز الطبيب وا75% لسه ماتحلتش كأنها حسبة برمه
ربنا معاكوا ويصبركو
============