تاريخ مجلس نقابة د/ حمدي السيد

تاريخ مجلس نقابة د/ حمدي السيد

بقلم : د/ شيماء مسلم

ويعلن المجلس أنه مجتمعاً برئاسة النقيب ويؤكد رغبته في الإسراع بالانتخابات لتجديد دماء إدارة النقابة بعد المجهود الطويل التي قام بها طوال الفترة السابقة لاستمرار النقابة في نشاطها وعدم توقف الأنشطة النقابية المختلفة وجهوده المتواصلة للارتقاء بالمهنة على كافة الأصعدة.

ومما هو جدير بالذكر أن السيد نقيب الأطباء كان قد تم تزوير الانتخابات التشريعية الأخيرة ضده من أباطرة الفساد السياسي التي كانت تتحكم في البلاد. وذلك لأنه كان من الجناح المعارض داخل الحزب الوطني الحاكم في ذلك الوقت.

كما أن لجنة الصحة والتي كان يرأسها السيد النقيب قد قدمت العديد من المشروعات والقوانين لصالح الوطن وصحة المواطنين""

ده جزء من البيان المنشور على موقع النقابة بتاريخ 3 مارس 2011
و اللينك بتاعه
http://www.ems.org.eg/akhpar_hama/1-3-3-11.htm

===========================

أول جزء فى البيان بيقول انهم يبحثوا استشارة كبار القانونيين فى
أولا هل يتم اجراء انتخابات للمجلس كله و لا تجديد نصفى على اعتبار انه الفترة اللى فاتت( اللى هى 18 سنة) دى انقطاع بسبب قهرى!!!!!!!!!!!!!
...............................

ودى تصريحات تانية فى بيان بتاريخ 23 يناير 2011

صرح د. حمدى السيد – أنه بصدد دراسة اعادة ترشيحه كنقيب لأطباء مصر في الانتخابات النقابية المقبلة من عدمه.

وأكد د. حمدى السيد أنه وزملائه نقباء وأعضاء مجالس النقابات العامة والفرعية شاركوا لمدة طويلة في العمل النقابي منذ آخر انتخابات أجرتها النقابة عام 1992، وقد أرسلنا للمستشار القانوني لوزارة الصحة – باعتبارها الوزارة المختصة – ولمجلس الدولة .. نسألهما هل هذه المدة الطويلة تعتبر فترتين أم فترة واحدة؟؟

وقال د. السيد أن هناك تخوف من أن الدفعات الجديدة من الأطباء والتى التحقت بالمهنة منذ عام 1992 ويزيدوا عن مائة ألف طبيب .. لم يمارسوا العمل النقابى وليست لديهم أية فكرة عن حقوقهم وواجباتهم، وسيدخل ممثليهم لمجلس النقابة الجديد.

وأضاف النقيب أنه قد يكون من الأليق أن يضم المجلس الجديد عدداً من الأطباء ذوى الكفاءات النقابية ليتم توارث الخبرات بين أجيال الأطباء المتعاقبة من أجل أداء نقابي متميز لمصلحة جموع الأطباء

البيانين منشورين على موقع النقابة.. وانا عندى تساؤل بسيط لمجلس نقابتنا الموقر(اللى عايز يشوف مدى قانونية انه 18 سنة تبقى فترة واحدة علما بانه المفروض فى اللائحة انها 4 سنوات و التجديد النصفى بيحصل بعد مرور اول سنتين!!!!!) عموما كل شىء جايز
.................

الحقيقة هو مش تساؤل واحد.....

أولا: ألم يتم اجهاض قرار الجمعية العمومية الطارئة فى فبراير 2008 باجماع اكتر من 5000 طبيب حضروا من كل محافظات مصر,, باضراب للأطباء (طبعا ما عدا الطوارىء) و ذلك لاقرار كادر الأطباء....و تم ذلك فى مؤتمر صحفى بحضور 11 او 12 طبيب...علما بانه سلطة الجمعية العمومية هى اعلى سلطة فى النقابة و لا يجوز حتى لمجلس النقابة مجتمعا الغاء قرارتها

ثانيا : ألم يتم حذف قرار الجمعية العمومية مارس 2010 بوقفة احتجاجية بعموم مستشفيات مصر يوم 3 مايو 2010 ,,اذا لم يتم الاستجابة لمطالب الأطباء (بتثبيت حافز 300%كبدل ثابت لكل الأطباء ,, و بدل عدوى 300 ج و تخفيض رسوم الدراسات العليا) علما بأن السيد مقرر لجنة النقابات الفرعية قام بعمل مسودة بالتوصيات لكتابتها لاحقا ,,لنفاجىء بعدم وجود هذا القرار نهائيا فى القرارات,,و كانت الاجابة انه سيادة النقيب رفض!!!!!و بقية أعضاء المجلس الذى يتم فيه التصويت بالأغلبية لم يحرك ساكنا!!!!

ثالثا: القرار الخاص بجمع التوقيعات على المطالب سالفة الذكر فى نفس الجمعية العمومية برغم كتابته فى القرارات الا انه لم ينفذ
فلم تقم النقابة بجمع توقيعات(و التى جمعناها بشكل فردى باللف على المستشفيات و من النت لنصل الى حوالى 2600 توقيع) و كان محدد موعد 19 أبريل لتسليم التوقيعات لوزارة الصحة و رئاسة الوزراء ووزارة التعليم العالى..وهذا الموعد تم تحديده فى الجمعية العمومية26 مارس(يعنى كان معروف مسبقا)و لكن حين طلبنا من مجلس النقابة ممثلا للذهاب لتسليم التوقيعات,,,كان الرد انه النقيب مش موجود(لأنه كان محجوز برة مصر بسبب العاصفة وقتها)!!!!طيب مش الموعد متحدد من شهر...نستنى النقيب ليه؟؟؟و رحنا احنا سلمنا التوقيعات!!!!!!!!!

رابعا: قرار الجمعية العمومية بالمحاسبة التأديبية للمديرين المتعسفين اداريا و ذكر منهم بالاسم مديرى مستشفيات فارسكور و سوهاج و كفر الشيخ..و الذى لم يتم تنفيذه...اللهم الا بعد شهور يبد
استدعاء و يظل التعسف ,, بل و يعاقب بعض زملائنا لأنهم اشتكوا فى النقابة!!!!!!!!!

و برغم التصريح فى الجمعية العمومية انه المحاسبة هتكون لأيا من كان حتى لو الوزير نفسه....ظل مجلس النقابة تماطل فى محاسبة د سمير النمكى ..مساعد الوزير لما سببه من اهانة بالغة لزملائنا أطباء منفلوط.. و بعد 6 شهور نلاقى اتبعتله انذار عشان بس يحضر التحقيق!!!!!!!!!!
طيب مين يحمينا؟؟؟؟؟؟

خامسا : قرار الوزير بالغاء التسجيل بالنسا و الأطفال.. و الذى قام زملائنا بمقابلة النقيب و تقديم شكوى فى النقابة.. و كانت الاجابة انهم تقريبا تم طردهم من مكتبه .. و ان اللى مش عاجبه يستقيل!!!!!

سادسا: المهازل اللى حصلت فى حركة الزمالة الأخيرة من توزيع فى أماكن لم تكن مكتوبة أصلا فى الرغبات و أماكن ليس بها مدربين..و برضه تقديم شكوى فى النقابة و انه الموضوع سيتم طرحه مع الوزير.. و لكن كان شيئا لم يكن

سابعا: قانون المجلس الطبى الوطنى,, و اللى سألنا عليه النقيب و أعضاء من مجلس النقابة قالوا ما نعرفش عنه حاجة.. و بعدين لما نوصله من أحد الصحفيين نلاقى انه مذكور فيه انه النقيب هيكون عضو فيه أو أحد أعضاء النقابة’,,بس هم برضه ما كانوش يعرفوا!!!!!!!!!!!!!!1
و لما اتعملت ورشة بالنقابة لمناقشته و مناقشة قرار الغاء التسجيل بالنسا و الأطفال( و اللى كانت النقابة هى اللى محددة موعده و وعدت بدعوة شخصيات عامة و أساتذة من كليات الطب) ,,لكن لم يكن موجود غير السيد مقرر لجنة النقابات الفرعية,,لأنه عرفنا بعدين انه كان فى نفس اليوم مؤتمر للسياحة العلاجية!!!!!!!!!!!!فعلا أهم بكتييييييييييييير

ثامنا: فى مشكلة أطباء منفلوط لما قام د سمير النمكى بعقابهم بانهم يكون لهم تمام يوميا من 9 صباحا الى 5 مساءا فى الوزارة فى مكان أقل ما يقال عنه انه اودة فيران بدون أن يكون مسموح لهم بالذهاب لأى مكان طوال هذه الفترة..لمدة 10 أيام.. و حين علم احد زملائنا و ذهب اليهم و صورهم بالموبايل و تم نشر الصور هنا و فى الاعلام,,و تقدم الطباء بشكوى فى النقابة..قالهم سيادة النقيب روحوا اقعدوا هناك لحد ما أكلم الوزير أحسن يزعل,, و ما فرقتش يوم كمان ما بقالكم 10 أيام!!!!!!!!!!
.....................
ده غير بقى تصريحات سيادة النقيب عن اننا نستحق الزكاة ..ثم اننا مرتباتنا أقل من الشغالات......فعلا مجهود منقطع النظير,,
....................
سيادة النقيب كان دايما بيشكو ان الأطباء هم أسوأ حضور للجمعيات العمومية,,رغم انه كل اللى بيتعمل عشان الأطباء يحضروا هو اعلان فى صحفنا القومية..اللى محدش بيقراها أصلا,,هل من الصعب انه يتبعت لكل مدير مسشتفى اعلان يكون جنب الامضاء عشان الأطباء كلهم يعرفوا
اخر جمعية عمومية برضه كنا احنا اللى بننشر الموعد وسط زملائنا و وسط المستشفيات اللى نقدر نوصلها

و بعدين لما الأطباء يحضروا من كل المحافظات و يتفقوا على قرارات بالتصعيد لتحسين أوضاعهم ..يتم الغائها بجرة قلم بقرارات فردية

و مؤخرا يوم الخميس الماضى 3 مارس ,,

جاء السيد الدكتور مقرر لجنة النقابات الفرعية عشان يشوف طلباتنا و اللى هى :

1-اجراء الانتخابات فى أقرب وقت و تحديد موعد و التصويت عليه فى الجمعية العمومية القادمة
2-اقصاء د حمدى السيد من ادارة الجمعية العمومية و عدم التحدث باسم الأطباء
3-مجلس مؤقت من شيوخ المهنة يقوم بادارة الجمعية العمومية و الاشراف على الانتخابات و يتم اختياره و التوصيت عليه فى بداية الجمعية العمومية

كان رد سيادته انه د حمدى السيد مالوش اى علاقة بأعمال النقابة دلوقتى و انه الانتخابات هيبتدى الترشيح لها فى يوينو ولما اعترضنا على انه وقت بعيد..قال نبقى نتفاهم عليه فى الجمعية العمومية و قال انه التعديلات اللى اتفق عليها قبل كده فى لائحة النقابة عشان الانتخابات خلاص هتتعمل
و لما قلنا على المجلس المؤقت اعترض
و لما قلنا عايزيين بيان مكتوب بالكلام ده..قال لما نبقى نشوف

و فى نفس اليوم طلع البيان اللى اللينك بتاعه فى اول التوبيك
!!!!!!!!!!!!!!!!!!!!!

ــــــــــــــــــــــــــــــــــــــــــــــــــــــــــــــــــــــــــــ

كل ما كتبته دلوقتى ..عشان المجلس اللى عايز يشوف ستار قانونى يخلى فترة 18 سنة فى النقابة ..انقطاع بسبب قهرى..هو فعلا قهرى بس مش ليهم..ده لينا احنا
كل اللى كتبته ده حصل فى خلال سنة واحدة هى عمر علاقتى انا شخصيا المباشرة بالنقابة .. و اللى كنت قبلها معرفش غير التصريحات العنترية اللى بتقول انه النقيب و المجلس بيجاهدوا فينا طول الوقت.. و انهم مابيناموش الليل عشانا

اللى كتبته ده عشان ما ينفعش نفضل زى ما احنا... ما ينفعش تانى نسمح لحد يضحك علينا..ما ينفعش نفضل فاهمين انه كل دور النقابة انه ندفع فيها الاشتراك و نشترك فى مشروع العلاج

انا عارفة انى كتبت كلام كتير,,بس لأنه خلااااااااااااااص بقى..فعلا ما ينفعش ...معدش ينفع نفضل نايمين..الالاف من الأطباء اللى كانوا فى الميدان لازم يفضلوا ايجابيين زى ما كانوا فى الثورة..لازم دورهم يمتد لبناء نقابة قوية ..نقابة تعرق ازاى تدافع عن حقوقنا ...مش تشارك فى اهدارها

ده لينك التصويت على قرارات الجمعية العمومية
http://www.youtube.com/user/Doctorswithoutrights#p/u/63/lBnHu3YnCb4

و ده لينك مناقشة النقيب مع واحدة من زملائنا فيما يخص قانون المجلس الوطنى
http://www.youtube.com/user/Doctorswithoutrights#p/u/39/N3fA2rYdB_s

رأى سيادة النقيب فى الاضراب,و و انه مش قصادنا غير التفاوض فى عمومية مارس 2010(علما بانه بعدها سمعنا كلنا عن اضرابات عديدة فى مسشتفيات متفرقة لتأخر الحوافز و جاءت بنتيجة من أول يوم)
http://www.youtube.com/user/Doctorswithoutrights#p/u/60/RgJa9oyN4y8

و دى لينكات لاعتصامنا يوم 3 مايو2010 طلبا لتنفيذ قرارات الجمعية العمومية و اعتراضا على حذف قرار الوقفة الاحتجاجية بعموم مستشفيات مصر و التى كان محدد لها نفس اليوم
http://www.youtube.com/user/Doctorswithoutrights#p/u/50/tJddjZR7XVE
وده فيديو مدمج لاعتصام فى 2008 بعد الغاء قرار الاضراب,, و اعتصام مايوم 2010 برضه لحذف قرار الجمعية العمومية
http://www.youtube.com/user/Doctorswithoutrights#p/u/46/WePDwyrqYjo