إن الله لايغير مابقوم حتى يغيروا مابأنفسهم

انا د/ مروة من المنصورة دفعه 2005 المحظوظه
انا مش هتكلم عن الغباء البشرى فى الروتين ولا عن البشر اللى بنتعامل
معاهم وعاملوهم مديرين وهما مش فاهمين حاجه
ولا اى حاجه من اللى نقلتوها لان اللى انتوا حكيتوه مشاكل الاطباء
لكن اللى انا هحكيه مشاكل الناس
انا يا جماعه تكليفى فى كفرسعد دمياط
وفى وحده نائيه
ولازم اروح كل يوم
واقعد فى النباطشيه لما قلت للمدير انا مش هينفع ابات لوحدى فى الوحده
قالى هاتى حد من اخواتك يبات معاكى
قلتله ازاى يعنى هما اخواتى فاضين ولو فاضين حتى هو انتوا بتعاقبونى
انى دخلت طب انا واسرتى
اقول لمدير الاداره يا بيه انا بنت ازاى ابات لوحدى فى 190 متر لوحدى
وفى حته مقطوعه كمان
يقولى حد قالك تدخلى طب
والله يا جماعه جالى تفتيش من الوزارة الدكتورة بتاعه تنظيم الاسره
بتسالنى انتى منين يا بنتى قولتلها من المنصورة يا دكتورة قالتلى منهم
لله اللى شردوكم
قلتلها والله لو كنت بتعلم مكنتش زعلت قالتلى تتعلمى انتى هنا فى مقبرة
الاطباء
التعليم هناك فى الجامعه
المهم ما علينا
انا بقه موجوده فى الوحده ليه
هو ده السؤال
طول النهار بمضى استمارات مواليد وشهادات وفيات ووالله العظيم لا شفت حد
بيتولد ولا حد بيموت
واختمى الورق ده يا دكتورة حاضر وامضى هنا
حاضر لا وكله كوم وحمله شلل الاطفال دى كوم
لازم امر فى الشارع وانا لابسه البالطو
سلام عليكم عندك عيال يا حاجه اتفضلىى يا ابله وتدخل الممرضه تطعم وتعلم
انا بقى لزومى ايه
مش عارفه واقفه اتفرج
ول بيت ندخله يسالوا التمريض مين الحلوه اللى معاكم دى يا ابله فلانه
دى الدكتورة يا حاجه
يا حلاوة الدكتورة بحالها اتفضلى يا بنتى شكرا ياحاجه
انتى منين
ومتجوزة يختى
لا حول الله
وما عندكوش وحدات فى بلدكم
لا ياست عندنا بس الوزارة عاوزة كده
ولما سالت وكيل الوزارة انا لزمتى ايه حضرتك فى الحمله
قالى احتمال يحصل طوارىء وحضرتك لو حصل للعيال حاجه هعملهم ايه
قالى مش مهم تعمليلهم المهم انك موجوده ودفاترك مظبوطه العيال تموت مش
مهم عندهم
ماشى
نيجى بقى للكشف
اللى جاى يكشف عاوز كبسونات مضاد حيوى علشان يحطها للفراخ
وعارف انى معنديش ادويه غير مضاد حيوى ومطهر معوى وطارد بلغم
طول النهار بكتبهم
وبعدين مفيش صيدلى اقوم انا اصرف الدوا
ونيجى بقى للاستقبال
او الاستهبال ان جاز التعبير
عندى ابرة مصديه بقالها 5000 سنه اتخيط بها توت عنخ امون قبل كده
وخيط والله متردوش تخيطوا بيه المراتب
يا جماعه كده حرام
يا بيه من فضلك عاوزين ابر جديده ونستخدمها ونرميها علشا العدوى يرد
عليا ويقولى متعرفيش اننا بنعقمها يا دكتورة
قلتله ازاى دا احنا بنغسلها بيتادين
قالى ماو البيتادين ده ايه مش تعقيم
يا بيه فيرس سى
والايدز
يا بيه كده حرام
راح رادد بكل غباء
والله لو ضميرك تعبك اشترى ابر على حسابك وريحينا
يا تدى لضميرك راحه احنا مش فى الجامعه
احنا فى الصحه
رديت وقلتله تقصد احنا فى وزارةازاله وتدمير الصحه
وغيره وغيره
لاء وكمان بيجيلى واحد معاه شهاده نحو الاميه بيشتغل فى المجلس المحلى
يفضل يقولى ده كتبتيه ليه
وده مضى ليه
وده ايه
سالته حضرتك دكتور
قالى لا
قلتله امال هتفهم ازاى
قالى هو انتوا بقى اللى دكاترة
انتوا موظفين هنا زينا زيكوا

لاء وايه يقولى ايه ده يا دكتورة فين الشجر ماله ضعيف كده ليه وحولين
الوحده ماله كده فى قش
قلتله حضرتك انا معايا بكالوريوس طب مش زراعه
انا مالى انا ومال الشجر قالى ازاى ده الواجهه بتاعتك
قلتله خلاص ابقوا اصرفولى فاس وانا هظبط الجنينه يا بيه بقولك معنديش
ابر للعيانين ولا جوانتيات فحص وتقولى شجر
قالى لا مش مهم الابر المهم الشجر
وبعدين ازاى تسمحى ان يبقى فيه قش حولين السور
قولتله معلش اصرفولى بندقيه صيد اموت العصافير قليله الادب اللى بتوقع
القش
قالى حضرتك بتهزرى قلتله بصراحه انتوا اللى بتهرجوا
قش ايه وشجر ايه بقى كنت بطلعوا عينينا فى المذاكرة والامتحانات علشانن
الشجر والعصافير حسبى الله ونعم الوكيل يا ناس انا معنديش مكتب اقعد عليه
وبكشف على طرابيزه
اقولكم ايه بس

اقولكم اننا طب المنصورة اسؤ مجاميع على الجمهوريه
واننا ان شاء الله مش هنلاقى حتى نيابه مسح سلالم فى الدقهليه
اقولكم ان الجلديه والنسا خدت من 81 فى الميه
وانا اللى جايب 79 فى الميه كان ليه بوست فى الجامعه
وان كل اللى دخل الدقهليه طب طنطنا وطب الزقازيق
واحنا والحمد لله عاملين زى موبينيل بنغطى مصر كلها
قنا ومطروح والعريش والبحر الاحمر والسلوموتوشكى

اقولكم انى لازم اروح كل يوم واركب 8 مواصلات رايح جاى علشان اروح الوحده
ولو غبت يوم يتشطب عليا وشؤن قانونيه وجزاءات بالهبل
يا ناس انا مستلمه فى الوحده يوم 28/6لحد النهارده 25 يوم جزا
تخيلوا
وبفضل امضى واختم زى بجد الكتبه زماااااااااااان فى الافلام وارجع كمام
البلوزات كوبيه
والدتى قالتلى ابقى لبس كم اسود بتاع الباش كاتب
الجميل بقى انى الحمد لله نسيت كل اللى اتعلمته
نسيت انا اصلا ضيعت عمرى ليه
بندم انى تفوقت وزاكرت اه
بندم انى هنا فى البلد دى اه
عارفين زنبنا ايه
اننا فى بلدمبتقدرش الناجحين
كفايه ابو تريكه وهانى سلامه ونانسى عجرم
تقدرهم الدوله
كفايه ورده مثلا تعالجها الدوله على حسابها
وانت مثلا راجل دكتور واستمارة مرتبك كاتبين فيها 2 ج و15 قرش بدل عدوى
وبدل غلاء معيشه
كفايه انى دكتورة قد الدنيا ومش عارفه اقولهم فى البيت خلاص انا كبرت مش
عاوزة المصروف اللى هو اكبر من المرتب
كفايه اننا مش قادرين ندى لاننا اتظلمنا
يا عبادى انى حرمت الظلم على نفسى
ربنا حرم الظلم واحنا استبحناه بينا
الدوله والحكومه شركاء فى قتل احلامنا
الدوله والحكومه اجهضوا احلامنا فى باكورتها
فاروق جويده قال
وباى حق تطلب من صغير بعد ان قطعوا يديه بان يصافح
هو ده حالنا بالضبط
انت كل اللى بتحلم بيه تاخد ماستر وتسيبهالهم
وتمشى من البلد دى
او تسيب الطب وتغنى
او نعمل فيديو كليب
مش هنسى ان الدكتورة اللى ركبت الاير واى لمحمد صديق كرموها وعملولها
هيصه
علشان انقذت النجم ابن مصر
ومكنوش هيعبروها لو انقذت عم محمود اللى فى الشارع
ولا كانوا هيسالوا فيها لو قصرت فى عم ابراهيم اللى فى الشارع
زى تماما ما قالها استاذ عندنا
زمان فى الكليه
عاوز تشتهر
ركب لولب ليسرا
او بنج سعاد نصر
او انفخ وش هيفا
لكن تتعلم او تدور على العلم
يبقى هتضيع يا بنى
د/ احمد شفيق اتوفى من كام يوم حد سمع حاجه
عملوله حاجه
هو مين احمد شفيق اصلا راجل ضيع حياته فى العلم والبحث الطب ايه يعنى
لكن احمد زكى لاااااااااااااا
طبعا ده رمز من الرموز
ده اللى التاريخ هيخلده ده كفايه انه علمنا يعنى ايه كابوريا
د/ زويل قال لهم نعمل جامعه وكليه للبحث العلمى قالوله اسكت يياراجل
انت بحث ايه وكلام فارغ ايه انت عاوزنا نشغل مخنا
روح يا راجل شوفلك شغله
حصل ولا انا بفترى عليهم
د/ غنيم الراجل اللى عمل اسطورة مركز الكلى قالوهم انا عاوز ابقى
العميد علشان عاوز اصلح سياسه الطب فى مصر قالوله تصلح ايه يا راجل انت
متشكرين انت كبرت خليك بقى متفرغ وابقى شقر علينا
لما تقعد مع الراجل ده يقولك الطب فى مصر نكسه بكل المقاييس
وعلشان كده عمرنا ماهنتغير الا اذا احنا قلننا لا
لالالالالالالالالالالالالالالالالالالالالالالالالالالالالا
لا
ان الله لا يغير ما بقوم حتى يغيروا ما بانفسهم
احنا اصلا اللى سكتنا من البدايه علشان كده هما افتروا واحنا برضه لسه
ساكين
__